سلفتي هي صديقتي و بعمري تقريبا ..ذكيه جدا ما شاء الله تبارك الله وكانت تطلع الاولي ع الجامعه.. وطبعا النوعيه دي من البشر عندهم فضول الاستكشاف
ولها جمله شهيره كده اسمها( جاي علي بالي) جاي ع بالي ادوق هاد.. اشوف هاد.. اقرأ هاد .. اجرب هاد
هي بس تحكي الجمله دي .. بنودع اهلنا ونسلم الأمانات لاصحابها ونستودع نفسنا الله
ياما جربنا معاها أكلات تجيب الاسقربوط
وملابس اون لاين ننكسف نطلعها صدقه
وذهب رخيص ويطلع القفل نحاس
الفلوس اللي ضاعت في (جاي علي بالي)كانت اشترتلي بنايه
المهم كنا مره بنحتفل بالعيد الكبير ورايحين عند بيت حمايا وسيارتنا ورا بعض.. قوم ايييييه.. ابله دودو قالت جاي علي بالي اشوف الخروف في بيت سلفي قبل ما يندبح ويجيبوا لحمته لبيت حمايا
حولنا مسار السيارات علي بيت سلفي ونزلنا من السيارات وانا شايله البيبي وكلنا لابسين لبس العيد ومتأنتكين وحاجه ابهه..
دخلنا بيت سلفي واغلقنا البوابه ورانا ودخلنا نشوف الخروف .. الا والخروف ايه يا ولاد هاه اييييه يا ولاد ؟؟ وجه لوجه معانا وقاطع الحبل بتاعه
الله اكبر يمكن اضخم خروف اشوفه في حياتي .. القرن بتاعه ممكن تنشري عليه الغسيل من طوله
وواقف يبصلنا هيخلص علي مين فينا الأول .. مفاصلنا سابت وصارت رخوه زي الجيلي
كنا مقبلين علي الحياه صرنا مدبرين نجري ونبص ورانا
والمشكلة فين ؟؟ قفلنا البوابه بالقفل وأنا شايله البيبي ولابسه كعب عالي والجنينه رمل.. غرزت زي السياره النقل في الصحراء ( ماله الزحافي غلط في حقي في حاجه).. وما اجي ع بالي الا اصرخ وأقول هنموت النهارده وخلاص زي ما بيقولوا في اللغه العربيه الفصحي اسقط في يدي
ازواجنا سمعوا الصريخ جم جري وهجموا علي الخروف وكانت مباراه خياليه فاز فيها الخروف تلاته صفر
مرمط أزواجنا ونتف هدومهم ويمسكوه التلاته يرميهم علي ضهورهم ويجري ..وهكذا لحد ما اترموا عليه وكتفوه ..
روحنا ع حماتي شافت أشكالنا وكاننا طالعين من حرب .. كان هيغمي عليها هدومنا وسخه ومقطعه وعرقانين ومرعوبين.. قال عيد قال
المهم جه ميعاد الاكل حطولي قطعه لحم من الخروف.. ما قدرت احطه بفمي حسيته بيبرقلي في الطبق.. اكلت فته حاف.. حماتي تقولي كولي قولتلها أنا بقيت نباتيه.. انتوا وحوش ما بتحسوش بالحيوانات.. قالتلي من امتي يا بنتي دنتي ناقص تاكلينا..قولتلها من النهارده
بعد مرور سنين مش قادره اعرف ليه احنا روحنا للأستاذ خروف
رايحين ناخود بخاطره قبل ما ندبحه مثلا ؟؟
في شي مهم عايزين نعرفه منه قبل ما يموت؟؟
عايزين نعرف مخبي الريموت فين؟؟
نسأله هيوصي بالكرشه والفشه لمين؟؟
في مثل مصري بيقول الفضول قتل القطه.. الفضول كان هيقتل القطه وسلفاتها
وانا أنا ايه اللي وداني اتفرج نفسي اعرف .. دنا كنت باشوف خرفان في طفولتي اكتر ما كنت باشوف اهلي.. طول النهار العب معاهم علي سطح العمارة
المبرر الوحيد اللي جه ببالي ان ده عقاب ربنا لينا أنا وسلفاتي عاي فلوس أزواجنا اللي ضيعناها علي نزوات جاي عاي بالي
بقلم / سعاد سالم